PAULAK UNE - TINGKIR TANGGA

ACARA PAULAK UNE – TINGKIR TANGGA

Molo ni parate-atehon do ditingkion dung piga hali ni ihut hon, partording ni ulaon sadari, ima ulaon unjuk dipasada dohot Acara Paulak Une dohot Tingkir Tangga, nunga gabe hurang bermakna manang hira naso marlapatan  idaon. Marbonsir mai ala naung loja nadua bola pihak, paranak dohot parboru, gabe sai hera natarsipu-sipu nama pardalanan ni acara i idaon, tarlumobi molo situasi manang partingkian nunga mandok borngin, isara ni naung pukul 19.00 Wib manang pukul 7 (pitu) borngin, ala naung loja kesanna berengon hera na tukar kado nama antara paranak dohot parboru.

Paulak Une ima ulaon haroro ni Paranak mandapothon Parboru pasahat sipanganon berupa juhut lengkap dohot namargoarna, jala molo Tingkir Tangga ima ulaon haroro ni Parboru mandapothon Paranak pasahat dengke.

Pangkataion ditingki Paulak Une + Tingkir tangga sai mamereng tu tingki nama (si-kon), nunga jot-jotan holan sekedarna nama diulahon acara i. Antong molo songoni nama partordingna, porlu dope ingkon ulahonon ton acara Paulak Une dohot Tingkir Tangga ditingkion?.

Adong do piga pangantusion manang pemahaman ni halak na binereng taringot tu Paulak Une dohot Tingkir tangga.

Parjolo mai, ia Paulak Une + Tingkir Tangga ingkon ulahonondo, Alana molo so diulahon, ndang boi dope boru muli (pengantin wanita) borhat mandapothon bagas (tu jabu) ni Natorasna (Parboru). Jadi asa pintor boi leluasa pengantin borhat mandapothon huta manang bagas ni natoras ni boru muli ingkon jolo diulahon do Paulak Une, namarlapatan molo dung diulahon acara Paulak une dohot Tingkir tangga dibagasan ulaon unjuk sekaligus, ndang adong be hambatan manang namangorai molo pintor ro pengantin marsogot nai tu jabu ni Parboru.

Pangantusion na paduahon, ia acara Pulak Une + Tingkir tangga, nunga gabe hasomalan na wajib diulahon ditingki acara ualon unjuk, Alana boan-boan di tingki acara Paulak Une + Tingkir tangga laos inama nagabe jual sisigaton ni Parboru/Paranak di bagas (jabu) masing-masing.

Pangantusion na patoluhon, ima namarhubungan tu penghematan biaya, alana molo di ulahon di ari namangihut, ingkon tition ma ari jala mardalan gokhon (undangan), suang songoni taringot tu sibahenon (makanan) ingkon tersendiri ma muse pesanon tu Parcatering, gabe memakan biaya na cukup besar.

Molo nirimang-rimangan dapot roha do alasan i sude, alai nangpe songon i, naeng ma nian pemahaman manang pangantusion taringot tu Acara Paulak Une dohot Tingkir tangga ingkon tong bermakna, jala unang ma dianggap gabe songon acara simbolis (asalma diulahon). Molo boi ingkon tong ma hilala on wibawa manang makna ni ulaon i.

Pangantusion Paulak Une.

Molo ni sungkun do angka natua-tua i na jolo, aha do lapatan ni paulak une. Mangihuthon panorangion nasida, ia UNE di goari  ma songon panjaga ni daging na dikhusushon tu angka namarbaju, molo boi dohonon hira JIMAT manang Benda Berhala doi nadihaporseai memiliki kekuatan yang ajaib laho manjaga daging (badan) asa unang adong baoa na mansegai (mangganggu) kegadisan siboru.

Molo toho do UNE I mambahen si Pengantin perempuan (boru muli) masih gadis (perawan) maka Pihak Pengantin Laki-laki (pangolin) wajib mengembalikan (paulakkon) Jimat i tu orang tua ni boru muli (PARBORU),  alani do dibahen nadidok istilah PAULAK UNE.

Molo songoni dope pangantusion di tingkion, ba tardok dope hita Sipele begu, alana tahaporseai dope adong benda berhala (JIMAT) naboi manjaga kegadisan seseorang.  Alai molo didok rohangku ndang marlakku be pangantusion sisongon i.

Molo pangantusionku, ingkon adong do tutu penghargaan tu Natoras ni boru muli molo berhasil do natua-tuana mangaramoti pergaulan ni boru nasida selain berhasil mendidik boruna sahat tu tingkat pendidikan tertentu, gabe boi ma goaron boru ni raja. Dapot roha do molo didok halak, salah satu ukuran perempuan didok boru ni raja, ima borua naboi menjaga kehormatannya (kegadisannya) disampingn berpendidikan tinggi. Alani  boima pangantusion UNE i dipahami manang diartikan  UNE = BAIK, DENGGAN, manang SEMPURNA.

Alani pemahaman PAULAK UNE boi ma talapathon manang pangantusion, suatu ungkapan rasa terimakasih sian PARANAK tu Pihak PARBORU ala PARBORU boi manjaga manang  mangaramoti  boruna (anak perempuannya) menjadi wanita yang baik (gadis).

Ditingkion berhubung komunikasi antara Pangoli dan Boru muli, ndang songon najolo (tidak seperti jaman dulu lagi), nunga masitandaan (saling kenal secara terbuka) andorang so marbagas (Ulaon Unjuk),  nunga adong tingki masibotoan hadirion ni Pangoli suang songon i nang Boru Muli ditingki masa pacaran (andorang so ulaon unjuk) namarlapatan Pangoli (Laki-laki) sudah mengetahui keberadaan Boru Muli (Perempuan) secara mendalam sebelum mereka sepakat untuk melanjutkan ke Jenjang PERNIKAHAN (Marbagas), dalam artian si Wanita (Boru muli) sudah dipastikan adalah wanita baik (boru-boru na une) bagi si Pria (Pangoli).

Molo boi do pangatusion songoni, ba ndang pola be dohonon menyalahi molo dipatupa Ulaon unjuk digabung dohot Paulak Une/Tingkir tangga pada hari yang sama (ULAON SADARI).

Pangantusion Tingkir Tangga

Tingkir tangga, sada istilah doi manang kata kiasan, namarpangantusion pihak PARBORU laho marnida manang meneliti keberadaan ni boruna  (Boru Muli) dung gabe anggota keluarga yang baru di Pihak Keluarga Paranak, denggan do diperlakukan borunai manang ndang. Molo ni kaithon do tu jaman tingkion ndang be marlakku be pemikiran sisiongoni nian, alana komunikasi nunga canggih, lapatanna molo naeng botoon khabar ni boru muli, nunga boi langsung boto on melalui perangkat komunikasi nuaeng on, isara ni Telepon, Hand phone, WA, Line, Face Book dohot na asing, bahkan gambar manang rupa ni boru nai pe nunga boi berengon secara langsung nangpe dao.

Dihilala roha Tingkir tangga molo ditingkion boi ma ra dohonon pangantusion songon acara sihol-sihol, manang kunjungan balasan ala naung ro ni Paranak mandapothon Parboru tingki Paulak Une. Di acara tingkir tangga boima dohonon pataridahon hubungan kekeluargaan antara PARANAK dengan PARBORU na semakin harmonis. Saat Tingkir Tanggalah kesempatan Pihak PARBORU memberikan kata-kata wejangan, doa dan berkat kepada PARANAK, sekaligus pasahathon beberapa nasehat kepada boru muli.

Jadi ala boi do dilapathon manang pangantusion taringot tu Tingkir tangga sebagai kunjungan balasan, ala ni do acara PAULAK UNE sekalian ma dilanjuthon tu acara TINGKIR TANGGA boi ma tapahami sada acara saling menghargai.

PARTORDING NI ACARA PAULAK UNE – TINGGKIR TANGGA (ULAON SADARI)

Ro ma Paranak mandapothon Parboru (tong ma di Gedung Acara Ulaon unjuk i dipatupa)

PARANAK :

Di hamu hula-hula nami Rajai (marga ------) dison rodo hami mandapothon hamu Hula-hula nami.

Raja nami, mansai las do roha nami ala mardalan dohot denggan ulaon adat na taulahon sadarion, sudenai ndang alani hagogoon manang hamaloonta, tung ala dengan basa di Amanta Namartua Debata do namandongani jala namangurupi hita, gabe boi mardalan dengan jala uli, sonang hita soharibo-riboan. Alani tama do hita mandok mauliate tu Debata Pardenggan Basa i, sai tong-tong ma hita didongani jala diurupi tu joloan ni arion.

Raja nami, nuaeng nunga dilambung nami boru mu, naung parumaen nami, tung une do haroro ni Parumaen nami, di naung sahat tu bagas nami, tung denggan do mardalan parsaoran ni Anak nami dohot Parumaen nami, alani Raja nami, nuaeng ro hami tu hutamuna on laho Paulak Une, pasahathon las ni roha nami huhut mandok mauilate tu hamu Hula-hula nami.

Raja nami songon hata ni tua-tua ma dohonon nami :

Urat ni ate-ate tu tampuk ni pusu-pusu

Nunga tung uli jala une do haroroni parumaen nami di keluarga nami, laos  mangkilala do hami naung dapotan di pasu-pasu.

Ni bola unte mungkur, angur songon sangge-sangge

Asa lam tung denggan hita namartutur, nuaeng ro hami pamoruon muna laho paulak une

Raja nami, dison huboan hami sipanganon na tabo, sipanganon namarsaudara

Molo tung songonon dope raja nami naboi tarpatupa hami, songon hatani umpasa ma dohonon nami, Sititi ma di gompa, golang-golang pangarahutna, uli otik, godang sosadia sipanganon nahupatupa hami on, ba sai godangma pinasuna.

Las ma rohamuna raja nami manjalosa asa saut songon hata ni umpasa namandok;

Bagot namarhalto ma, naniagatan di robean

Horas ma hamu namanjalosa, tugabena ma hami namangalean. Botima Raja nami.

(Digeser ma boan-boan ni Paranak tu jolo ni Parboru).

Di alusi PARBORU :

Mauliate ma hupasahat hami tu hamu Raja ni Pamoruon nami (Marga -----), dinaung ro hamu tu bagas nami laho Paulak Une, jala di boan hamu tu hami sipanganon na tabo, sipanganon namar saudara.

Hami pe tong do mandok mauliate tu Amanta Debata Pardenggan basa i, ala boido mardalan denggan ulaonta sadarion, toho ma i tutu, tung uli do begeon hita  namanghatai adat i songon ogung oloan masialus-alusan, jala dengan berengon masitomu-tomuan songon doton di tao toba. Laos martamba las ni roha nami, ala didok hamu paboa na une do haroro ni boru nami tu bagas muna, tung denggan do mardalan parsaoran ni boru nami dohot hela nami didok hamu, nang hami pe sian Hula-hula muna tong dohonon nami songon hatani natua-tua :

Suaksuak niporda, angar-angar ni sarune

Mauliate ma di haroro muna, dina ro hamu tu bagas nami Paulak une

Aek ni anturge, parsuapan ni parsoban

Nuaeng ro hamu  pamoruon nami Paulak Une, Lam tudenggan nama partuturonta, Horas ma hita jala gabe, sonang soharibo-riboan.

Disipanganon naung pinasahat mu tu hami, dohonon ma songon hata ni natua-tua;

Asa bonang nigalama, sakumpal salabean,

Horas ma hami namanjalo sipanganon napinasahat muna, sai lam tu gabena ma hamu tutu namangalean.

Pining ma  sian dairi, napuran sian angkola

Sipanganon na pinasahat muna i, sai mambahen sihar ma panaili, sipaneang holi-holi mai, jala sipaulak hosa loja.

Tambaan ku dope hatangku tu hamu nadua, dihamu helangku dohot borungku :

Dolok Martimbang hatubuan ni simarhora-hora,

Amanta Debata nadi Banua ginjang, dipasu-pasu ma hamu laho gabe, ditea-tea laho mamora.

Sai tibu ma ho boru, togu marurat tu toru, tongam mardangka tu lambung jala jagar marbulung tu ginjang,

Asa ampang siopat suhi, solup siopat bale

Sorang ma anak di hamu sipartahi, dohot boru na olo gabe

Sahat-sahat ni solu, sahat ma tu bontean, toho dirondang ni bulan

Sai sahat ma hita leleng mangolu, sahat tu panggabean-parhorasan, jala tong-tong hita diramoti Tuhan.

Botima.

Di boan Boru ni Parboru ma boan-boan ni Paranak, tu ingananna. Sidung i, di peakkon parboru ma dengke di jolo nasida laho sipasahatonna tu Paranak ala naeng ro ma nasida TINGKIR TANGGA.

PARBORU :

Di hamu pamoruon nami, nuaeng ro do hami tu huta munaon mandapothon hamu, songon daon ni sihol nami, molo di hata najolo didok ma Tingkir Tangga. Dison huboan hami do boras pir, asa songon hata ni umpasa ma dohonku Pir ma pongki, bahul-bahul bahen salongan, sai pir ma tondimu Pamoruon nami, luju-luju ma angka pansamotan. Laos dison dohot huboan hami lompan na tabo, ima dengke tio, dengke simudur-udur,  dengke sahat.

Sai lam tu tio nama parnidaan muna, tio nang parngoluon muna tu joloan on, ia tu toruan hamu dapotan mual na tio, tu dolok hamu dapotan jampalan nalomak, dengke simudur-udur maon tutu, asa mangudurhon hagabeon, mangudurhon parhorason, udur angka parsaulian songoni nang angka pansamotan di hamu, dengke sahat do tutu goaron, asa sahat ma nauli, sahat nadenggan jalo on muna tu joloan on ditumpak asi dohot holong nasian Debata.

Molo tung songon dope naboi tarbahen hami tu hamu Pamoruon nami, songon hata ni natua-tua ma dohonon;

Asa tintin ma natinopa, hodong ma bahen lais ni ruma, Tung songon dope natarpatupa, sai godang ma pinasuna.

Dijalo PARANAK ma nabinoan ni PARBORU tu jolona, dungi didok ma hatana.

PARANAK :

Mauliate malambok pusu ma hupasahat hami tu hamu Raja ni Hula-hula nami, diharoro muna tu huta nami on laho tingkir tangga. Di pasahat hamu tu hami parbue sipir ni tondi, sai saut matutu songon na nidok munai, pirma pongki, bahul-bahul bahen salongan, sai pir ma tondi nami, martamba-tamba ma tutu sinamot, laos dipasahat hamu tu hami dengke na tabo, dengke tio, dengke simudur-udur jala dengke sahat. Mauliate ma di dengke naung pinasahat muna tu hami, songon hata ni umpasa ma dohonon Bagot namarhalto ma na niagatan dirobean, sai horas jala gabe ma hami namanjalo, songon ni nang hamu namangalean.

Raja nami, hata ni natua-tua mandok,

Dengke ni tarabunga, peak di pinggan pasu

Mauliate ma dipasahat roha nami di naro hamu Tingkir tangga, laos dapotan hami di pasu-pasu.

Asa harbangan ma dalan huta, balatuk dalan tu jabu

Hata pasu-gabe naung pinasahat muna, huboan hami mai martonga jabu

Asa peak mai diabingan  nami, jujung di simanjujung nami jala tuak di abara nami.

Asa tingko ma inggir-inggir, bulung nai rata-rata,

Sude hata pasu-gabe naung pinasahat muna hula-hula nami, pasauthon ma Amanta Namartua Debata.

Antong di namulak hamu sian huta namion, tontu maradian do hamu anon laho mangalap gogo di tongan dalan, Raja nami, uli otik godang sosadia, molo tung songon on dope naboi tarlehon hami tu hamu laho pasituak na tonggi di hamu Raja nami, ba las ma rohamu manjalosa. (dipasahat Paranak ma Hepeng tu Parboru).

Antong songon hata ni umpasa ma dohon ku;

Sahat-sahat ni solu, sahat ma tu bontean, Nunga sahat ulaon unjuk rap dohot ulaon Paulak Une songoni ulaon Tingkir Tangga ta ulahon ditingkion, ba sai leleng ma hita mangolu, sahat tu panggabean sahat tu parhorasan.

Mauliate ma di hita sudena, mauliate ma di Tuhan ta. Botima.

Di tutup ma dohot tangiang. (Denggan ma sian Hula-hula manang Tulang)

Mulak ma tu Bagas manang jabu masing-masing.