ACARA PATUA HATA + MARHUSIP

ULAON MARHUSIP

(Marga Hutajulu Vs Pardede di Pekanbaru)

Protokol ni Paranak.

Horas Tulang…, Horas ma di Raja i. Hata ni natua-tua mandok :

Jolo nitiptip sanggar laho baen huru-huruan.

Jolo pinabotohon marga asa binoto partuturan.

Raja nami… ia hami naroon, pamoruon muna marga Hutajulu do Tulang.

Protokol ni Parboru.

Horas ma tutu Amang boru.

Dung i marsijalangan ma nasida angka na naeng martondong di bagasan las ni roha.

Protokol Paranak.

(Pasahat boan-boan sian Paranak)

Tulang na burju, tona ni dainang mandok, molo borhat hamu tu bagas ni Tulang mu na ingkon adongdo boanon mu sipanganon na tabo laho palas roha ni Tulangmu, sotung mangembal hamu, alani do Rajanami na marningot do hami di tona dainang i, ido umbahen na huboan hami sipanganon na tabo laho palashon roha ni angka Tulang dohot Nantulang. Botima.

Protokol ni Parboru

Mauliate ma tutu Amangboru, ingot do hamu antong di poda ni namboru nami, Horas ma di hamu.

Borunami…  asa jolo sigati hamu jo boan-boan ni paribanmu.

Alusni Boru ni Parboru

Di hamu hula-hulanami nunga husigati hami, jala suman do.

Protokol ni Paranak :

Manguduti hata huhuasi,

“Di hamu Tulangnami (ndang apala didok dope hula-hula) di ari na uli di bulan na denggan on ro do hami pamoruonmuna mandapothon hamu, pasahat sipanganon na marsaudara, Rajanami. Molo tung songon on dope naboi hupasahat hami di tingki on, las ma rohamu manjalo.

“Songon hata ni situa-tua ma dohonon,

Asa bonang nigala sakumpal, salabean,
Horas ma di hamu na manjalo, horas nang hami namangalean.
.

Diolophon natorop, “horas ma tutu!”.

Catatan : Mamereng tu tingki, biasana sai jolo marsipanganon asa mangkatai.

DUNG SIDUNG MARSIPANGANON

Parsinabung ni Parboru:

Mangkatai ma hita Raja ni Boru. Nunga tung las roha nami manganhon sipanganon nabinoanmuna i. Bosur hami mangan indahan na las, sagat marlompan juhut na tabo dohot minum aek sitio-tio. Asi ma roha ni Tuhanta, sai dipasu-pasu ma i, asa pamurnas ma i tu daging, saudara tu bohi, sipalomak imbulu ma i, sipaneang holi-holi, jala sipasindak panaili.

“Mauliate ma di hamu. Jala dohonon ma songon hata ni situa-tua:

Bagot namarhalto na niagatan dirobean,

Horas ma hami namanghasagathon,

ditambai Tuhanta ma di hamu namangalean.

“Asa jolo ninang-nang do asa ni nungnung, jolo pinangan do asa ni sungkun”.

Namanungkun ma hami tu hamu Raja ni Boru taringot tu sintuhu ni indahan masak dohot lompan na tabo i.

Dia ma nangkatna, dia ma haltona,

Dia ma hatana, dia ma nanidokna.”

Raja Parsaut ni Paranak:

“Gabema angkup ni nahoras, Rajanami. Dinamanungkun ma Raja i di hata ni indahan masak dohot lompan na sosadia i. Alai jumolo ma hupasahat hami mauliate, malambok pusu tu hamu, di panjalo jala di panjangkonmu di hami pamoruonmuna on.

“Taringot di sungkun-sungkun ni Raja i, taringot tu hata ni sipanganon I, songon hata ni natua-tua ma dohononnami Rajanami:

Marbau tanduk, marbau holi-holi

Godang si butong-butong, otik si pir ni tondi.

Otik so sadia pe na boi hupatupa hami Rajanami,

Asa tintin ma natinopa, hodong ma lais niruma

Molo tung songoni dope natarpatupa hami Tulang, sai godang ma pinasuna

Sai pamurnas ma i tu daging, marsaudara ma i tu bohi,

Huhut sipasindak panaili mai, jala sipaneang holi-holi.

“Taringot tu hatana, panggabean parhorasan do Rajanami. Botima!

Parsinabung ni Parboru:

“Mauliate ma Raja ni boru, panggabean parhorasan do hape haroromuna di tingki on. I do nataparsinta. Alai raja ni boru, sai marangkup do ninna nauli, mardongan do nadenggan. Asa siangkupna songon nahundul, jala sidonganna songon namardalan.

Namanangkasi ma hami di hamu boru,

Alana marbindu do ninna songon surat, margalung songon hauma, jala martanda songon adian, marsipatudu songon dalan.

Asa tangkas ma uju ni Purba, tangkasan uju Angkola,

Tangkas ma tutu hita maduma, tangkasan ma hita luhut mamora.

“Tangkas ma dipaboa Amangboru tu hami sitangkas ni Panggabean dohot Parhorasan, aha naboi begeon ni sipareon jala na bolas sitiopon di roha. Botima!”

Raja Parsaut ni Paranak:

“Tangkas ma tutu paboaon tu Raja i, siangkupna songon nahundul, sidongan songon namardalan, sitangkas ni panggabean dohot parhorasan di haroronami mandapothon hamu di tingki on.

Raja nami, di ari nasalpu, ro do alu-alu ni anaknami tu hami, paboahon naung tangkas masitandaan jala masihaholongan dohot boru ni Raja i sian bagas on. Didok tu hami, ‘Bapa uda laho ma hamu mandapothon Tulang Marga Pardede di Pasirputih, ala nunga masihaholongan hami dohot boru ni Tulang i, jala nunga mardos ni roha, satahi-sapanghilaan hami laho mamungka parsaripeon, ima alu-aluni anak nami tu hami Raja nami.

“Tarsonggot do hami nian umbege alu-aluna i, alai las roha-nami. Alana, tingkos do di rohanami, ro anaknami tu bagas muna on. Alai parjolo hami marsantabi Raja nami, molo hurimangi hami dirinami marhite sibahenon, tung na so bolas dope hami nian mandapothon Raja i. Alai nangpe songoni, ala tangkas do diboto hami dung husungkun hami anak nami, burju do Tulang i, ninna tu hami, ala nido raja nami, mangasahon pos ni roha do hami rap dohot anaknami ro tu jolo ni Raja i di tingki on. Jadi on pe Tulang, molo tung siat elek-elek manang pangidoannami, asa unang ma nian holan hata ni naposo be, asa mangihut ma nian tu hata ni angka natua-tua.

“Jadi Tulang, napatua hata ma haroronami di tingki on. Asa dohot ma nian nang hamu manjangkon anak nami na naeng hela muna, i ma elek-elek dohot pangidoan nami. Sidok boti hami.

Parsinabung ni Parboru:

“Mauliate ma Amangboru”.

“Asa di hita namardongan tubu, Boru, Bere, nunga tangkas tabege sian pamoruonta di haroro nasida, i ma di napatua hata. Andorang so nilehon tingki di laho mangido pandapot sian hita, jolo tapatangkas ma jolo borunta ate, manang natutu do dijalo hata sian anak ni pamoruonta.

 “Di hamu borunami, sungkun hamu jolo maenmu.”

 Alus ni boru sian pudi: “Sintong jala tutu do Amang nanidok nasida i.”

Dung i diuduti ma muse panghataion:

Parsinabung ni Parboru:

“Asa di hita namardongan tubu, Boru, Bere, asa talehon pandapotta. Jala parjolo ma sian dongan tubu, haha doli/anggi doli, Boru, Bere.”

Hata sian haha doli/anggi doli, Boru, Bere, manolopi nauli nadenggan sude. Nangpe ndang ris manghatai.

Parsinabung ni Parboru:

“Jadi di hamu Raja ni Pamoruonnami, nunga dibege hamu angka pandapot sian hami. Nunga satolop hami asa hujalo hami ma haroromuna di napatua hata. Sai didongani Tuhanta ma hita sude jala dipasu-pasu angka ulaonta. Botima! Horas ma di hita saluhutna.”

Raja Parsaut ni Paranak:

“Mauliate. Malambok pusu ma dipasahat hami Tulang, di naung tangkas dioloi hamu elek-elek dohot pangidoannami di napatua hata. Huulahi hami muse mandok mauliate ma di hamu Rajanami.

Tulang!!!, adong do hata ni natua-tua namandok;

Sapala napantis, unang ma sada galangan,

Sapala naung niula, unang ma diparalang-alangan.

Molo siat dope pangidoan nami, raja nami, laos ditingkion ma nian tapatupa tu acara namarhusip laho mangarangrangi di angka ulaon na mangihut, na marpardomuan tu sangkap (rencana) parsaripeon ni anaknami dohot boru ni Raja i. Mauliate parjolo hupasahat hami.

Parsinabung ni Parboru:

“Mauliate di Raja ni Pamoruonnami. Andorang so hualusi hami lehon hamu jolo tingki, asa mangalap hata hami, angka namardongan tubu, boru, bere.

Ditariashon ma tu sude horong ni parboru i taringot tu ulaon parhusipon. Jala sude manolopi (setuju).

“Ala nunga dos rohanta, mauliate ma!”

“Ipe di hamu Raja ni Pamoruonnami, taringot tu pangidoanmuna i hujalo hami ma i, songon dia husip-husip manang angka dia ma naung disangkapi rohamu, Hupasahat hami ma tingki tu hamu asa hamu ma namanariashon. Botima!”

Raja Parsaut ni Paranak:

“Gabe ma jala horas Tulang. Nunga tamba las ni rohanami. Songon nahudok hami nangkin, ia haroronami tu bagasmuna on ala ni alu-alu ni anaknami do, jala sai dihatahon do tu hami haburjuonmuna. “Tulang, andorang so hutariashon hami husip-husip dohot pangidoannami, mangido tingki hami satongkin namarhaha-anggi (namardongan tubu) asa masipasangapan jolo hami, songon i tu boru dohot bere, ibeberenami.

“Di hita saluhutna, tu hamu dongan tubu, boru dohot bere/ibebere, nian andorang so laho borhat dope hita tu bagas ni Tulangta di jabuon, nunga sada tahinta jala sahata, nasisada pangidoan hita laho mangelek dohot pasahathon angka pangidoanta tu hula-hulanta. Beha, ahu ma napasahathon elek-elekta i ?” Ditolopi sude sian horong ni paranak, boru, bere, ibebere.

“Di hamu Tulang, Nantulangnami, dohot sude hamu na huparsangapi hami. Sian hami pamoruonmu mangido, mangelek hamu, molo siat pangidoan nami, di hami ma nian na pabolak amak jala tomu-tomuon nami ma haroro ni Raja i dipogu ni alaman nami, ulaon taruhon jual ma nian Rajanami ulaonta di ari nanaeng ro on, jala marpangidoan do hami asa laos ulaon sadarima tapatupa (paulak une, tingkir tangga).

“Taringot tu somba ni uhum, somba ni adat manang sinamotni boruni raja i, Rajanami, hami pe nunga dos rohanami dohot tahinami, asa sisahali mangelekhon, sisahali manombahon ma hami tu hamu, Rajanami, rambu pinudunmai jala sirambe manis. I ma jolo elek-elek manang pangidoannami Raja nami.”

Parsinabung ni Parboru:

“Mauliate ma di Raja ni Pamoruonnami. Nunga tangkas hubege hami pangidoan muna i, i ma di sangkapmuna di ulaon unjuk nanaeng ro on, ima ulaon taruhon jual, jala ulaon sadari.

Tarsingot di pangidoanmuna na sahali manombahon hamu di sinamot ni borunami, asa tangkas taingot ndang namarhata sinamot do pe hita Amangboru, songon pangidoanmuna nangkin, namarhusip-husip dope hita di tingki on. Alai nadenggan ma i tutu, ingkon jolo nirangrangan do angka nanaeng ulahononta haduan. Antong lehon hamu ma jolo tingki di hami, asa hupasahat ma jolo panghataion on, tu hami na mardongan tubu, boru, berenami.

Haha/anggi dongan tubu:

“Di hamu pamoruonnami, taringot di ulaon taruhon jual dohot ulaon sadari, mauliate ma. Alai molo taringot tu sinamot ni borunami, tung tangkas jala godang pasahat hamu, asa las rohanami hula-hulamu. Pasada hamuma horbona, hodana dohot angka masna, alani tangkas jala godang ma bahen hamu, Amangboru. Botima!”

Boru, bere, pariban:

“Molo sian hami, songon nanidok ni hula-hula/tulangnami nangkin do. Asa las roha nasida, pasahat hamu godang sinamot ni paribannami i. Botima!”

Parsinabung ni Parboru:

 “Di hamu Raja ni Pamoruonnami, nunga apala tangkas dibege hamu di angka panghataion dohot pangidoan sian hami. Taringot di pangidoanmuna, ulaon sadari, hujalo hami ma i. Suang songoni taringot di sinamot ni borunami, didok hamu sisahali manombahon jala rambu pinudun, alai Amangboru tarsingot tu suhi ni ampang na opat dohot panandaion tangkas do padalanonmu di tongan ni mangajana ate?.

Jadi tung tangkas jala godangma pasahat hamu, asa saut songon nidok ni natua-tua,

Nunga pitu lilinami, paualu jugianami,

Nunga uli nipinami, ai gok ma sinamot di hajutnami.

“Ipe Raja ni Boru, huoloi hami ma pangidoanmuna i jala tangkas ma hatahon hamu sian i.”

Raja Parsaut ni Paranak:

“Mauliate ma di hamu Rajanami. Suang songon i di paribannami. Malambok pusu jala lumbang panghilalaannami, ala tangkas dioloi hamu angka pangidoannami. Suang songon i di sinamot ni Boruni Raja i, na naeng parumaennami, ima rambu pinudun. Raja nami, ia godang ni sinamot na laho sipasahatonnami Rajanami, godangna Rp 30.000.000,- (Tolupuluh juta rupiah) ma. Asa las ma rohamu jala gabehon hamu ma i Rajanami. Botima!

Parsinabung ni Parboru:

“Mauliate ma di Raja ni Pamoruonnami, nunga tangkas hubege hamu sinamot ni borunami, godangna Rp. 30.000.000,- (Tolu puluh juta rupiah). Jadi di hita na mardongan tubu, songon i di boru, bere/ibebere, nunga taoloi nian nangkin elek-elek nasida sisahali mandok, alai nangpe songoni, lata pe nalata, duhut-duhut do sibut-buton, hata pe pinarhata tong do tu hasuhuton sungkunon.

Hata sian paidua ni hasuhuton, mangingil asa ditambai.

Raja Parsaut ni Paranak:

Tulang, huantusi hami do pangidoan muna, asa tambaan nami sinamot ni boru ni Rajai, alai tudos songon hata ni natua-tua Tulang,

Sai niluluan tandok, alai nadapot parindahanan

Tolap do pamangan mandok Raja nami, alai ndang tuk jamaon ni tangan.

Ni dapot assosoit, di toru ni tumbara,

Sotung ma didok hamu hami namangkolit Raja nami, I dope na boi tarpatupa

Namangelek ma hami saulak nari, tung gabehon hamu ma Tulang na huhatahon nangkin, disi ma tandina, disi dohot tandona ; disi ma daina, disi dohot tabona.

Ima talina, laos ima dohot parompana. Sidok boti hami Tulang.

Parsinabung ni Parboru:

Mauliate ma di hamu Pamoruon nami, nunga tutu mangelek hamu, na olat ni nama tarbahen hamu, taringot tu sinamot ni boru nami. Alai songon nahuhatahon nangkin, ndang namarhata sinamot dope hita, manang marpudun saut, holan mangarang-rangi dope.

“Alai, di hamu Raja ni Pamoruonnami, taringot tu jambar na gok ima suhi ni ampang na opat dohot panandaion, asa tangkas muse pasahat hamu tu hami. Taringot tu goar-goarna, hupasahat hami pe tu hamu haduan marhite suhutnami.”

Jadi Amangboru…, mauliate ma, alai asa dos nangkokna dohot tuatna, atik adong sipangidoonmuna sian hami, rade do hami mangoloi hamu olat ni natarpatupa hami

Raja Parsaut ni Paranak:

 “I do tutu Rajanami…..,”

Tangkas do huboto hami anggo angka Nantulangnami tung mansai namalo do martonun, jala angka ulos natinonun ni angka Nantulangnami angka ulos nauli do, dibaheni Rajanami sude do hami saluhutna Pomparan ni Ompunami dohot angka Boru dohot Berenami ulosan muna. Molo tung pe dang sude hami uloson mu marhite ulos herbang, alai tong ma ulosan mu hami sude marhite ulos natinonun sadari, Ia ulos herbang hupangido hami ma tu hamu 15 (sampulu lima) lembar.

Parsinabung ni Parboru:

 “Tutu doi Amangboru….,”

Anggo angka Nantulangmuna on, sude do on partonun jala mansai sihol do roha laho mangulosi hamu sude dohot Ulos Herbang alai ditingkion nunga maol dapot bonang, ala i anggo ditingki on, ba huoloi hami ma pangidoan munai 15 lembar Ulos Herbang sipasahatonnami, jala angka na so dapotan Ulos herbang pasahatonnami ma tu nasida ulos natinonun sadari. Botima Raja ni Boru.

Raja Parsaut ni Paranak:

Mauliate ma Rajanami, ala sigodang tondong do Suhutnami on jala on dope ibana pangolihon anak, molo siat pangidoannami Tulang, hupasahat hami pe bonangna tu hamu laho sipasahatonmu tamba ni  15 lembar i, ima pangidoannami Rajanami,. Botima.

Parsinabung ni Parboru:

Mauliate ma Amangboru huoloi hami pe i, alai ingot hamu unang ma gumodang uramna sian dengkena.

Raja Parsaut ni Paranak:

Mauliate ma Tulang, nunga mangantusi ma hami di nanidokmunai.

Parsinabung ni Parboru:

Antong laos tauduti ma laho mangarangrangi nanaeng siulahononta tu ari nanaeng ro on.

Diuduti ma muse mangarang-rangi taringot:

1.      Partumpolon, sekaligus rencana marhata sinamot

2.      Pamasu-masuon, ari/tanggal dohot jomna

3.      Pinggan Panganan dohot Ulos tinonun sadari masinangkohi tangga ni balatukna be ma.

4.      Panandaion tu Suhi ni Ampang na Opat dohot namardomu tusi.

5.      Upa ni Tulang ni Pangoli (Tintin Marangkup).

6.      Alaman Parpestaan (Gedung) dohot godang ni Undangan sian Parboru/Paranak.

7.      Jom ni namarsibuha-buhai dohot siboanon ni Paranak di namarsibuha-buhai.

Dung sidung dirang-rangi angka naringkot tu rencana ulaon unjuk, dipangido Paranak ma asa ditutup acara patua hata/marhusip i, tu Parboru marhite tangiang, sekaligus manangiangkon Paranak mulak tu Jabuna/Bagas nabe.

                                                     =======&&&&&=======